భారత సూపర్స్టార్ క్రికెటర్ విరాట్ కోహ్లీ టెస్ట్ క్రికెట్లోకి తిరిగి రావడానికి ఏమాత్రం ఆలోచించడం లేదని మరోసారి తేల్చి చెప్పాడు. ఢిల్లీలో తన 'One8' బ్రాండ్ కొత్త షూస్ కలెక్షన్ ఆవిష్కరణ సందర్భంగా ఈ విషయం వెల్లడించాడు. గత ఏడాది మే నెలలో టెస్ట్ ఫార్మాట్కు రిటైర్మెంట్ ప్రకటించిన కోహ్లీ, ప్రస్తుతం కేవలం వన్డేలకే పరిమితమయ్యాడు.
ఈ కార్యక్రమంలో కోహ్లీ టెస్ట్ క్రికెట్లో సాధించిన 9,230 పరుగుల గుర్తుగా ఎర్ర రంగు బూట్ల ధరను రూ.9,230గా నిర్ణయించారు. ఈ సందర్భంగా అమ్మకాలు పెంచుకోవడానికి మళ్లీ టెస్ట్ క్రికెట్ ఆడతారా అని అడిగిన ప్రశ్నకు ఆయన నవ్వుతూ సమాధానమిచ్చాడు. బూట్లు తక్కువ అమ్ముడైనా పర్లేదు కానీ, తాను ఆ టెస్ట్ క్రికెట్ దశను దాటి వెళ్లిపోయానని కోహ్లీ స్పష్టం చేశాడు.
తన కెరీర్లో మొత్తం 123 టెస్ట్ మ్యాచ్లు ఆడిన కోహ్లీ, 30 సెంచరీలతో 9,230 పరుగులు సాధించాడు. కొందరు నిపుణులు ఇంకా కొన్నేళ్లపాటు ఆయన టెస్ట్ క్రికెట్ ఆడాలని అభిప్రాయపడుతున్నప్పటికీ, కోహ్లీ మాత్రం తన నిర్ణయంలో ఉన్నారు. మ్యాచ్లు చేజారిపోయినప్పుడు జట్టును గెలిపించడమే తన విధి అని, 2022 టీ20 ప్రపంచకప్లో పాకిస్థాన్పై మెల్బోర్న్లో ఆడిన ఇన్నింగ్స్ను ఆయన గుర్తుచేశాడు.
హ్యామ్స్ట్రింగ్ గాయం కారణంగా ఆఫ్ఘనిస్తాన్తో జరిగిన వన్డే సిరీస్కు దూరమైన 37 ఏళ్ల కోహ్లీ, త్వరలోనే మైదానంలోకి అడుగుపెట్టనున్నారు. ఇంగ్లాండ్లో జరగనున్న మూడు వన్డేల సిరీస్లో ఆడేందుకు ఆయనను ఎంపిక చేశారు. ఈ సిరీస్కు ముందు బెంగళూరులోని 'సెంటర్ ఆఫ్ ఎక్సలెన్స్' (CoE)లో సోమవారం ఫిట్నెస్ పరీక్షకు హాజరుకానున్నాడు.
జూలై 14 నుంచి ప్రారంభమయ్యే ఈ సిరీస్తో కోహ్లీ మళ్లీ ఫామ్లోకి వస్తారని అభిమానులు ఆశిస్తున్నారు. ఇంగ్లాండ్తో జరగనున్న ఈ పర్యటనలో ఆయన ప్రదర్శనపై అందరి దృష్టి సారింది.
