దంబుల్లా వేదికగా జరిగిన భారత్-ఎ, శ్రీలంక-ఎ మ్యాచ్లో వైభవ్ సూర్యవంశీ శ్రీలంక ఆటగాడు విశేన్ హలంబెజ్ను నెట్టిన ఘటనపై బీసీసీఐ (భారత క్రికెట్ నియంత్రణ మండలి) కార్యదర్శి దేవజిత్ సైకియా స్పందించారు. ఆటగాడిపై చర్యలు తీసుకుంటారనే ఊహాగానాలను ఆయన కొట్టిపారేశారు. ప్రస్తుతం ఆటగాళ్లు టోర్నమెంట్పై మాత్రమే దృష్టి పెట్టాలని, బాహ్య వివాదాల వల్ల వారి ఏకాగ్రత దెబ్బతినకూడదని తాము భావిస్తున్నట్లు స్పష్టం చేశారు.
ఈ మ్యాచ్ సూపర్ ఓవర్కు దారితీసింది. శ్రీలంక నిర్దేశించిన 17 పరుగుల లక్ష్యాన్ని ఛేదించడంలో భారత్-ఎ జట్టు విఫలమైంది. కేవలం 9 పరుగులు మాత్రమే చేయగలిగిన భారత్, చివరి మూడు బంతులు ఎదుర్కొన్న వైభవ్ సూర్యవంశీ మ్యాచ్ను గెలిపించలేకపోవడంతో ఈ త్రైపాక్షిక సిరీస్లో వరుసగా రెండో ఓటమిని చవిచూసింది. మ్యాచ్ అనంతరం శ్రీలంక ఆటగాళ్లు ఉత్సాహంగా వేడుకలు జరుపుకోవడం వైభవ్కు నచ్చలేదు.
తన బ్యాటింగ్ భాగస్వామి సూర్యాంశ్ షెడ్గేతో కలిసి పెవిలియన్ వైపు వెళ్తున్న వైభవ్, శ్రీలంక ఆటగాళ్ల ప్రవర్తనపై ఆగ్రహం వ్యక్తం చేశాడు. ఈ క్రమంలో వాగ్వాదం చోటుచేసుకోగా, కోపంలో ఒక శ్రీలంక ఆటగాడిని భౌతికంగా వెనక్కి నెట్టేశాడు. మిగిలిన శ్రీలంక క్రికెటర్లు వెంటనే జోక్యం చేసుకోవడంతో పరిస్థితి అదుపులోకి వచ్చింది. ఐపీఎల్ (ఇండియన్ ప్రీమియర్ లీగ్) ఫామ్ను కొనసాగించలేకపోవడం, స్లెడ్జింగ్లతో కలిసి ఈ ఘటనకు దారితీసిందని సమాచారం.
క్రికెట్ మైదానంలో భౌతిక దాడులు లేదా నెట్టివేతలను ఐసీసీ (అంతర్జాతీయ క్రికెట్ మండలి) తీవ్రంగా పరిగణిస్తుంది. ఐసీసీ ప్రవర్తా నియమావళిలోని ఆర్టికల్ 2.12 ప్రకారం, ఆటగాళ్లు, సపోర్ట్ స్టాఫ్, అంపైర్లు లేదా ప్రేక్షకులతో అనుచిత భౌతిక సంబంధం కలిగి ఉండటం నిషిద్ధం. ఉద్దేశపూర్వకంగానో లేదా అజాగ్రత్తగానో ఇతరులను ఢీకొట్టడం లేదా నెట్టడం ఈ నిబంధనల ఉల్లంఘన కిందికే వస్తుంది. అయితే, ప్రస్తుతానికి బీసీసీఐ ఈ యువ ఆటగాడిపై ఎటువంటి చర్యలు తీసుకోవడం లేదని స్పష్టమైంది.
