గ్లోబల్ సిటీగా ఎదుగుతున్న హైదరాబాద్లో ఇంటి అద్దెలు సామాన్యులకు అందనంత ఎత్తుకు చేరుకున్నాయి. నగరంలో భూముల ధరలు చదరపు గజానికి కనీసం 20 వేల రూపాయల నుంచి ప్రారంభమై, ఖరీదైన ప్రాంతాల్లో 3.5 లక్షల రూపాయల వరకు పలుకుతున్నాయి. ప్రభుత్వం భూముల మార్కెట్ విలువను సవరించడంతో పాటు, రాయదుర్గం పాన్ మక్తా ఏరియాలో టిజిఐఐసి (తెలంగాణ రాష్ట్ర పారిశ్రామిక మౌలిక సదుపాయాల సంస్థ) నిర్వహించిన వేలంలో ఎకరం ధర 237 కోట్లు పలకడం ధరల పెరుగుదలకు కారణమయ్యాయి.
ముఖ్యంగా ఐటీ కారిడార్లోని మాదాపూర్, కొండాపూర్, గచ్చిబౌలి, రాయదుర్గం, ఫైనాన్షియల్ డిస్ట్రిక్ట్, తెల్లాపూర్, నల్లగండ్ల, గండిపేట వంటి ప్రాంతాల్లో అద్దెలు విపరీతంగా పెరిగాయి. ఇక్కడ గేటెడ్ కమ్యూనిటీల్లో రెండు బెడ్రూమ్, హాల్, కిచెన్ (2 బిహెచ్కె) ఇంటి అద్దె 40 నుంచి 50 వేల రూపాయల వరకు, మూడు బెడ్రూమ్ ఇళ్లకు 60 నుంచి 80 వేల రూపాయల వరకు చెల్లించాల్సి వస్తోంది. విల్లాల అద్దెలు లక్ష నుంచి రెండు లక్షల రూపాయల వరకు ఉండగా, వాటికి అదనంగా 2 నుంచి 6 వేల రూపాయల వరకు మెయింటెనెన్స్ చార్జీలు, విద్యుత్తు, నీటి బిల్లులు చెల్లించాలి.
ఈ భారీ అద్దెలను భరించలేని 50 వేల రూపాయల లోపు వేతనం పొందే ఉద్యోగులు ఇబ్బందులు పడుతున్నారు. పిల్లల ఫీజులు, ఆరోగ్య ఖర్చులకే సగం జీతం ఖర్చవుతుండటంతో, వీరు సింగిల్ బెడ్రూమ్ ఇళ్లకు లేదా ఎల్బినగర్, హయత్నగర్, ఇసిఐఎల్, పటాన్చెరు వంటి శివారు ప్రాంతాలకు వెళ్లి సర్దుకుపోతున్నారు. రోజూ రాకపోకలకు ట్రాఫిక్ కారణంగా నాలుగు గంటల సమయం వృథా అవడం ఆరోగ్యంపై ప్రభావం చూపుతోందని ఉద్యోగులు వాపోతున్నారు. నగరంలో 65 శాతం కుటుంబాలు అద్దె ఇళ్లలోనే నివసిస్తున్నాయి.
రియల్ ఎస్టేట్ నిపుణుల ప్రకారం, ఆకాశాన్ని తాకుతున్న భూమి ధరలతో నిర్మాణ వ్యయం పెరగడమే అద్దెల పెరుగుదలకు మూలం. ముంబై, ఢిల్లీ తర్వాత చెన్నై, బెంగళూరు తర్వాతి స్థానానికి హైదరాబాద్ చేరుకుంటోంది. యజమానులు ఇల్లు కడితే వచ్చే అద్దె తమ లోన్ ఈఎంఐ (నెలవారీ వాయిదా) కు సరిపోవాలని భావిస్తున్నారు. దీంతో మధ్యతరగతి ప్రజలకు సొంతింటి కల కల్లగా మారి, అద్దె ఇళ్లలోనే జీవితాన్ని గడపాల్సిన పరిస్థితి ఏర్పడింది.
అభివృద్ధి పేరుతో భూములు కార్పొరేట్ శక్తులకు కట్టబెట్టి సామాన్యుడిని నగరం వెలుపలికి తరిమేయడం సరైంది కాదని ప్రజలు అభిప్రాయపడుతున్నారు. ప్రభుత్వం భూముల వేలం ద్వారా వేల కోట్ల ఆదాయం సమకూర్చుకుంటున్నప్పటికీ, ఆ ఆదాయంలో కొంత భాగాన్ని పేద, మధ్యతరగతి గృహ నిర్మాణ పథకాలకు మళ్లించాలని డిమాండ్ చేస్తున్నారు. తక్కువ ధరకు బహుళ అంతస్తుల భవనాలను సామాన్యులకు అందుబాటులోకి తేవాలని కోరుతున్నారు.
