బ్యాంకులు వినియోగదారుల ఆదాయానికి మించి అధిక క్రెడిట్ లిమిట్ను మంజూరు చేస్తున్నాయి. అయితే, కార్డుపై లభించే మొత్తం పరిమితి ఎంత ఉన్నా, ఖర్చు చేసే సామర్థ్యం పూర్తిగా వ్యక్తి ఆదాయంపైనే ఆధారపడి ఉండాలని నిపుణులు హెచ్చరిస్తున్నారు.
మొత్తం క్రెడిట్ పరిమితిలో 30 నుండి 40 శాతానికి మించి వినియోగించకూడదని నిపుణులు సూచిస్తున్నారు. ఈ ప్రాథమిక నియమాన్ని పాటించకుండా, విలాసాల కోసం మొత్తం లిమిట్ను వినియోగించినప్పుడే ఆర్థిక సమస్యలు తలెత్తుతాయి.
బిల్లు వచ్చినప్పుడు చాలా మంది చేసే ప్రధాన తప్పు కేవలం 'కనీస చెల్లింపు' మాత్రమే చేయడం. ఇది లేట్ ఫీజు నుండి కాపాడగలిగినా, మిగిలిన బకాయిపై 36 నుండి 52 శాతం వరకు వసూలు చేసే చక్రవడ్డీ భారాన్ని ఆపలేదు.
ఉదాహరణకు, రూ. లక్ష బకాయి ఉన్న సందర్భంలో, కేవలం ఒక్క నెలలోనే సుమారు రూ. 4,500 వరకు వడ్డీ రూపంలోనే కోల్పోవాల్సి వస్తుంది. ఈ విధంగా కనీస చెల్లింపులతో నెట్టుకురావడం వల్ల అప్పులు కొండలా పేరుకుపోవడం ఖాయం.
క్రెడిట్ కార్డు కూడా ఒక రకమైన అప్పు అనే విషయాన్ని మర్చిపోకూడదు. నెలవారీ స్టేట్మెంట్లను పరిశీలిస్తూ, నిర్ణీత పరిమితిలోపల ఖర్చు చేస్తూ, పూర్తి బిల్లును సకాలంలో చెల్లించడం ద్వారా మాత్రమే ఆర్థిక క్రమశిక్షణతో సురక్షితంగా ఉండగలరు.
