లెబనాన్లో ఇరాన్ తన ప్రచ్ఛన్న యుద్ధాన్ని వెంటనే ఆపివేయాలని, అక్కడి హెజ్బోల్లా శక్తులకు మద్దతు నిలపాలని అమెరికా అధ్యక్షుడు డొనాల్డ్ ట్రంప్ డిమాండ్ చేశారు. ఈ విధానాలను కొనసాగిస్తే టెహరాన్ సహా ఇరాన్లోని కీలక ప్రాంతాలను ధ్వంసం చేస్తామని ఆదివారం ఆయన తీవ్రస్థాయిలో హెచ్చరించారు.
అమెరికా ఉపాధ్యక్షుడు వాన్స్ నేతృత్వంలో ఇరాన్తో కీలక సంప్రదింపులు జరుగుతున్న తరుణంలోనే ట్రంప్ ఈ కటువైన వ్యాఖ్యలు చేశారు. స్విట్జర్లాండ్లోని జెనీవా సమీపంలోని రిసార్ట్ గ్రామంలో రెండు మూడు రోజుల వాయిదా తర్వాత ఇరుదేశాల ప్రతినిధుల శిఖరాగ్ర సమావేశం ప్రస్తుతం జరుగుతోంది.
గత నెల ఆరంభంలో ఇరుపక్షాల మధ్య కుదిరిన శాంతి స్థాపన ఎంఒయు (అవగాహన ఒప్పందం) అమలు కోసం చర్చలు వేగవంతమయ్యాయి. అయినప్పటికీ, హెజ్బోల్లా ఇరాన్కు తొత్తుగా పనిచేస్తోందని, లెబనాన్లో తెరవెనుక సైనిక చర్యలతో శాంతి నెలకొల్పడం సాధ్యం కాదని ట్రంప్ తమ ట్రూత్ సోషల్ మీడియా వేదికగా స్పందించారు.
లెబనాన్లో ఇరాన్ భారీ స్థాయిలో నిధులు పంపి, పరోక్ష శక్తులను సిద్ధం చేసుకోవడం సరైన పద్ధతి కాదని అమెరికా అధ్యక్షుడు అభిప్రాయపడ్డారు. ఈసారి అమెరికా దాడి ఘాటుగా ఉంటుందని, ఇరాన్ ఆ శక్తులను అదుపులో పెట్టాల్సిందేనని ఆయన తేల్చి చెప్పారు.
